Дарагая сумка прэміяльнага брэнда Louis Vuitton, якую брастаўчанцы прывёз з Парыжа муж, аказалася недарагой падробкай. Гэта высветлілі супрацоўнікі Дзяржкамітэта судовых экспертыз.
32-гадовая жанчына святкавала дзень нараджэння ў начной установе Брэста. Падчас адпачынку брастаўчанка выйшла на двор і забыла аксэсуар, у якім ляжалі 3 тысячы рублёў, на лаўцы.
Калі жанчына выявіла прапажу і вярнулася да лаўкі, каб яе забраць, сумачкі там ужо не было. Пацярпелая звярнулася ў міліцыю. Аператыўнікам яна расказала, што аксэсуар прывёз ёй у падарунак муж. Сумачку ён нібыта набыў у Парыжы ў фірмовай краме люксавага брэнда за 3800 еўра.
Аператыўнікі затрымалі двух падазраваных у крадзяжы. Маладыя людзі расказалі, што знайшлі сумачку і адпачылі «за чужы кошт».
У межах крымінальнай справы была прызначаная экспертыза. Эксперты высветлілі, што сумка з маркіроўкамі Louis Vuitton «не з’яўляецца арыгінальнай прадукцыяй названай гандлёвай маркі». Яе кошт — 101 рубель.
Па гэтым факце праводзіцца праверка.