40-гадовага мінчука, які на сваю бяду падабраў на паркоўцы пачак з-пад цыгарэт, будуць судзіць па «наркатычным» артыкуле: унутры аказаліся забароненыя рэчывы, расказалі агенцтву «Мінск-Навіны» ў пракуратуры Цэнтральнага раёна.
Мінчук на паркоўцы ля гандлёвага цэнтра знайшоў пачак з-пад цыгарэт, у якім ляжалі два скруткі са спрасаванымі рэчывамі. Дапусціўшы, што гэта можа быць гашыш, мужчына выкурыў частку, а рэшту паклаў у попельніцу свайго аўтамабіля Audi Q7.
Неўзабаве ён з таварышамі паехаў на рынак. Дарогай яны збочылі з МКАД на прасёлкавую дарогу да кукурузнага поля, бо аднаму з мужчын трэба было справіць патрэбу. Там іх спынілі супрацоўнікі наркакантролю, якія знайшлі ў салоне транспартнага сродку 1,58 г гашышу і 0,17 г тэтрагідраканабінолу.
На мінчука завялі крымінальную справу.
Мужчына працуе кіроўцам-экспедытарам у прыватнай кампаніі, раней да крымінальнай адказнасці не прыцягваўся. Яго абвінавацілі ў незаконных без мэты збыту набыцці, захоўванні і перавозцы наркатычных сродкаў і псіхатропных рэчываў (ч.1 арт. 328 КК). Віну мінчук прызнаў і раскаяўся.
Цяпер ён пад падпіскай пра нявыезд і належныя паводзіны.